“AzPolitika” Qərb mediasına istinadla xəbər verir ki, bu barədə Ağ Evin sözçüsü Con Kirbi brifinqdə deyib.

Kirbi əlavə edib ki, Ukraynanın Rusiya ərazisinə hücumları ilə bağlı ABŞ siyasətində heç nə dəyişməyib: Vaşinqton Rusiya ərazisində ABŞ-ın verdiyi silahlardan istifadə edərək Kiyev üçün təhlükə yaradan hədəflərə zərbələr endirməyə icazə verir.

ABŞ Dövlət Departamenti Ukrayna Silahlı Qüvvələrinin reydi barədə əvvəlcədən məlumatının olmadığını, lakin əməliyyatla bağlı Ukrayna ilə əlaqə saxladığını bildirib. Dövlət Departamentinin sözçüsü Metyu Millerin sözlərinə görə, müharibədə necə davranacağına Kiyev özü qərar verir.

Öz növbəsində Avropa Komissiyasının xarici siyasət məsələləri üzrə nümayəndəsi Piter Stano bildirib ki, Ukraynanın özünü müdafiə etmək, o cümlədən öz ərazisində təcavüzkara zərbə endirmək üçün qanuni hüququ var.

BMT baş katibinin nümayəndəsi Farhan Haq bildirib ki, Kursk bölgəsindəki vəziyyət hərbi münaqişənin gərginləşməsinə səbəb ola bilər.

"Biz vəziyyətin mümkün qədər az gərginləşməsini görmək istərdik", - Haq brifinqdə deyib.

Ukrayna hakimiyyəti hələlik Kursk vilayətinə hücumu şərh etməyib.

Ukrayna silahlı qüvvələrinin nizami bölmələri avqustun 6-da Kursk vilayətinin Sudjanski rayonunu ələ keçirib. Agentliyin son hesablamalarına görə, Ukrayna Kursk vilayətinin 350 kvadrat kilometrə qədər ərazisini işğal edib.

Həmçinin bildirilir ki, ukraynalı hərbçilər qazın Ukrayna ərazisindən keçməklə Avropaya ötürüldüyü Sudja qazölçmə stansiyasını ələ keçiriblər. Bu məlumatların rəsmi təsdiqi yoxdur.

Media Sudjanski rayonunun beş sakininin ölümündən yazır. Rusiya Səhiyyə Nazirliyi atışma nəticəsində 6-sı uşaq olmaqla 30-dan çox insanın yaralandığını bildirib.

Rusiya Prezidenti Vladimir Putin Ukrayna Silahlı Qüvvələrinin Kursk vilayətinə hücumunu “genişmiqyaslı təxribat” adlandırıb və hökumətə mülki əhaliyə yardım göstərməyi tapşırıb. Kursk vilayətinin hakimiyyəti fövqəladə vəziyyət rejimi tətbiq edib.