Sözügedən dividendlərlə bağlı bir məqam da diqqət çəkir: Büdcəyə ödənilən 127 milyon manatın 120 milyonu, yəni bütün dividendlərin 95 faizi cəmi bir quruma – Azərbaycan Beynəlxalq Bankına (ABB) aiddir. Bu bank səhmlərinə nəzarət zərfinin 95.15 faizi dövlətə məxsusdur və ABB son illərdə ilk dəfə dövlət büdcəsinə belə iri həcmdə dividend ödəyib. Palatanın rəyində deyilir ki, ABB son illərin maliyyə nəticələrini xalis mənfəətlə başa vurub.

Beynəlxalq Bankdan savayı "Aqrarkredit" QSC və "Azərlotereya" ASC də dövlət büdcəsinə gəlir qazandırıb. Hər iki qurumun büdcəyə ödədiyi vəsait proqnoz qədər olub. Ötən il "Aqrarkredit" büdcəyə 200 min manat, "Azərlotereya" 1 milyon manat dividend ödəyib.

Dövlətə məxsus digər bankın – "Azər-Türk Bank"ın büdcəyə 750 min manat dividend ödəməsi nəzərdə tutulsa da, heç bir ödəniş edilməyib. Hesablama Palatasının rəyində deyilir ki, "Azər-Türk Bank" ASC 2020-ci maliyyə ilini 423 min manat mənfəətlə başa vursa da, həmin məbləğ bankın kapital mövqeyinin və maliyyə dayanıqlılığının qorunması adı ilə dividend kimi səhmdarlara ödənilməyib və bankın kapital hesablarına aid edilib. Əvvəlki illərdə "Azər-Türk Bank" dövlət büdcəsinə, proqnozdan az da olsa, müəyyən məbləğdə dividendlər ödəyib. Ancaq son iki il ərzində bank dövlət büdcəsinə heç bir dividend ödəməyib.

Dövlət şirkətlərinin büdcəyə ödəyəcəyi dividendlərlə bağlı daha bir maraqlı məqam iri dövlət şirkətləri ilə bağlıdır. Nazirlər Kabineti təsdiqlədiyi siyahıda bu qurumları iri dövlət şirkəti sayıb: "Azərenerji", "Azərsu", "Azərişıq", "Azərbaycan Meliorasiya və Su Təsərrüfatı", eləcə də, Rəqəmsal İnkişaf və Nəqliyyat Nazirliyinin tabeliyində olan qurumlar ("Aztelekom", "Azərkosmos", "Azərpoçt" və "Bakı Telefon Rabitəsi"). Ötən il həmin qurumların dövlət büdcəsinə toplam 46 milyon manat dividend ödəməsi nəzərdə tutulsa da, nəzərdə tutulandan 9 dəfə az, cəmi 5 milyon manat ödənilib.

Dövlət şirkətlərinin büdcəyə ödəyəcəyi dividendlərlə bağlı proqnozun özünü doğrultmaması məhz adıçəkilən qurumların ödəyəcəyi məbləğin gözləniləndən az olmasından irəli gəlib.