APA xəbər verir ki, bu barədə BMT QAK-ın Ermənistandakı nümayəndəsi Kavita Belani mətbuat konfransında bildirib.

O deyib ki, qaçqınlar agentliyi Ermənistanda sürətlə dəyişən humanitar fövqəladə vəziyyətdən dərin narahatlıq keçirir və bir həftədən az müddətdə 88 700-dən çox qaçqın Ermənistana gəlib.

"Qaçqınların ilk qrupları yorğun, qorxmuş və gələcəklə bağlı təşviş içində gəldiyi ilk gündən BMT QAK komandaları yerində və sərhəddə olub. Onlar doqquz aydır blokadada yaşayırlar. Onlar qoyub gəldikləri evlərinin aqibətinin necə olacağını və qayıdıb- qayıtmayacaqlarını bilmirlər”.

Anadolu Agentliyinin sualına cavab olaraq Belani deyib ki, qaçqınlara qatşı pis rəftar qeydə alınmayıb: "Pis rəftar halları qeydə alınmayıb. Uzun və yorucu yol, tıxac insanlar üçün çətindir. Heç kim təzyiqə məruz qalma halları barədə məlumat paylaşmayıb”.

BMT Qaçqınlar üzrə Ali Komissarlığının nümayəndəsi bildirib ki, insanlar indi başlarına nə gələcəyindən və övladlarının təhsil ala bilməyəcəyindən narahatdır.

"Əksəriyyəti çox az əşya ilə gəlib və təcili yardıma, o cümlədən yorğanlara, yataq dəstlərinə, tibbi və psixososial yardıma ehtiyac vat və onlar üçün sığınacaqlar tələb olunur", Belani deyib.

Onun sözlərinə görə, Ermənistan hökuməti qaçqınları sərhəd qeydiyyat mərkəzlərində qeydiyyata alır, digər bölgələrdə isə əlavə 10-a yaxın humanitar mərkəz fəaliyyət göstərir.

“Hakimiyyət Ermənistanda qohumu olmayan yeni gələnləri müvəqqəti yaşayış yeri ilə təmin edir, onlar otellərdə, sosial mərkəzlərdə və məktəblərdə yerləşdirilir. Ancaq qısa müddətdə bu qədər çox sayda qaçqın gəldiyi üçün təcili olaraq əlavə təcili yardım mərkəzlərinə ehtiyac var".