AzFakt

Deputat Cavanşir Feyziyev Londonda milyonluq mülklər alıb - SİYAHI

Saleh Məmmədov 1 ilə 176 milyon manat artıq vəsait xərcləyib - RƏSMİ

Leysan Məmmədovun fəaliyyəti araşdırılacaq….- Milyonlar necə xərclənir?

“Azəraqrar”ın əsl rəhbəri kimdir? - Nazirin sabiq komandirinin maaşı 7 dəfə artırılıb?

Bizim iradəmizə qarşı çıxanın başı əziləcək - Azərbaycan Prezidenti

Maliyyə Nazirliyi AAYDA yoxlama aparır - Ciddi yeyintilər aşkarlanıb

Vensin Azərbaycana səfəri: Zəngəzur dəhlizinin müzakirələri yeni mərhələdə

Sovet təhsil elitası və cavabsız qalan suallar:Rektor 6 il sonra universitetə necə daxil olub?

Binəqədi rayonunda neft buruqları ərazisində daha bir qanunsuz tikinti - FOTO/VİDEO

Anar Əlizadə-Mübariz Mənsimov qarşıdurması - Kompromat savaşı yenidən başlayıb

Eldar Əzizovun narazı olduğu kadr: Xalid Ələkbərov yola salınır...

Sahib Məmmədovun “mənbə” axtarışı qalmaqal yaratdı - İşçilərin otağından dinləyici qurğu tapılıb

Eyyubov və digər vəzifəli şəxslərin əməlləri açıqlandı - Baş Prokurorluq məlumat yaydı

“Bravo”nun sönükən fəaliyyəti - Marketlər şəbəkəsinin rəqabətə davamlılığı niyə hər gün zəifləyir?

Azərbaycan-Türkiyə qardaşlığının, müttəfiqlik səviyyəsinə ucaldılmasının rəmzi-Şuşa Bəyannaməsi


Tarix 16.06.26, 6:25	Font ölçüsü : - / +

Azərbaycanın çoxəsrlik dövlətçilik tarixində elə dönüş nöqtələri var ki, onlar sadəcə cari dövrün siyasi mənzərəsini deyil, gələcək nəsillərin də taleyini və bölgənin geostrateji xəritəsini müəyyən edir.

2021-ci il iyunun 15-də Şuşada imzalanmış “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” məhz belə bir fundamental və epoxal sənəddir. Qars müqaviləsindən düz yüz il sonra, məhz Qurtuluş Günündə imzalanan bu bəyannamə, Azərbaycan-Türkiyə qardaşlığının rəsmi olaraq ən uca zirvəyə – müttəfiqlik səviyyəsinə ucaldılmasının rəmzidir.

Şuşa Bəyannaməsi sadəcə hüquqi və siyasi bir sənəd deyil, o, milli ruhun və tarixi yaddaşın təzahürüdür. Azərbaycan Prezidenti cənab İlham Əliyevin vurğuladığı kimi, bu sənəd xalqlarımızın böyük liderlərinin tarixi vəsiyyətlərinin XXI əsrdəki reallaşmasıdır. XX əsrin əvvəllərində Qazi Mustafa Kamal Atatürkün ifadə etdiyi “Azərbaycanın sevinci sevincimiz, kədəri kədərimizdir” fəlsəfəsi ilə XX əsrin sonlarında Ulu Öndər Heydər Əliyevin bəyan etdiyi “Türkiyə və Azərbaycan bir millət, iki dövlətdir” düsturu Şuşa Bəyannaməsinin ideoloji sütununu təşkil edir. Biz bu gün azad Şuşada bu sənədi imzalamaqla əcdadlarımızın ruhu qarşısında sadiqliyimizi nümayiş etdirdik və gələcək nəsillərin gedəcəyi strateji xətti cızdıq.

Bu Bəyannamə, hər şeydən əvvəl, bütün dünyaya verilmiş qətiyyətli bir strateji mesajdır. Azərbaycan və Türkiyə Prezidentləri cənab İlham Əliyev və cənab Rəcəb Tayyib Ərdoğanın nümayiş etdirdiyi sarsılmaz iradə iki ölkə arasında münasibətləri yeni müstəviyə daşıdı.

Sənədin ən mühüm regional əhəmiyyəti isə Ermənistandakı revanşist qüvvələrə və onların arxasında dayanan dairələrə verilən açıq xəbərdarlıqdır. Şuşa Bəyannaməsi ilə Türkiyə bəyan etdi ki, Azərbaycanın ərazi bütövlüyünə, suverenliyinə və dövlət sərhədlərinə qarşı hər hansı təhdid yaranarsa, Ankara bütün imkanları və ordusu ilə Bakının yanında olacaqdır. Müdafiə sahəsində əməkdaşlıq, müştərək hərbi yardım məsələləri və Silahlı Qüvvələrimizin müasir standartlara uyğun olaraq yenidən formalaşdırılması regionda yeni sülhün və sabitliyin yeganə qarantıdır. 44 günlük Vətən müharibəsində möcüzələr yaradan pilotsuz uçuş aparatlarının və hərbi texnologiyaların ölkəmizdə müştərək istehsal mərkəzinin yaradılması perspektivi hərbi qüdrətimizi daha da sarsılmaz edəcək.

Şuşa Bəyannaməsi regionda yeni iqtisadi və nəqliyyat reallıqları formalaşdırır. Bu layihələrin başında Orta Dəhlizin yeni nəfəsi hesab olunan və Mərkəzi Asiyanı Avropa ilə birləşdirən Zəngəzur dəhlizi dayanır. Eyni zamanda, uğurla icra edilən Qars-İğdır-Naxçıvan dəmir yolu layihəsi Naxçıvan Muxtar Respublikasının nəqliyyat blokadasını tamamilə yararaq onun iqtisadi potensialını maksimallaşdıracaq, Bakı-Tbilisi-Qars xəttinə inteqrasiya olunaraq Avrasiyanın ticarət xəritəsini yenidən formalaşdıracaqdır.

Bəyannamə çərçivəsində atılan addımlar hər iki dövlətin milli iqtisadiyyatının və ixracatının şaxələndirilməsinə xidmət edir. Qarşılıqlı investisiya qoyuluşları, əlverişli sərmayə mühitinin yaradılması işğaldan azad edilmiş ərazilərimizin sürətlə bərpasına və xüsusilə Şuşa və ətraf rayonların böyük turizm layihələrinin mərkəzinə çevrilməsinə rəvac verir.

Şuşa Bəyannaməsi həm rəsmi Bakının, həm də rəsmi Ankaranın beynəlxalq nüfuzunu qlobal miqyasda görünməmiş dərəcədə artırır. Yüksək Səviyyəli Strateji Əməkdaşlıq Şurası çərçivəsində tərəflər xarici siyasətdə tam koordinasiyalı fəaliyyət göstərirlər. Regional və qlobal müstəvidə vahid mövqedən çıxış etmək bizim beynəlxalq arenadakı çəkimizi qat-qat artırıb.

Bu gücü tamamlamaq üçün sənəddə xaricdə yaşayan Türk və Azərbaycan diasporlarının birgə fəaliyyəti, məlumat mübadiləsi və ən əsası Birgə Media Platformasının qurulması xüsusi bəndlərlə təsbit edilmişdir. Bu gün biz təkcə döyüş meydanında və masada deyil, qlobal informasiya və diplomatiya müstəvisində də bədxahlarımıza qarşı vahid cəbhədən hücum edirik və bu, strateji maraqlarımızın qorunması üçün mühüm alətdir.

Şuşa Bəyannaməsini sadə bir regional saziş deyil, gələcək əsrlərə yönəlmiş strateji doktrina adlandırmalıyıq. Bu bəyannamə iki qardaş dövlətin keyfiyyətcə daha yüksək və sarsılmaz işbirliyinin ali təminatıdır. Biz ulu öndərlərimizin bizə qoyub getdiyi milli vəsiyyətə sadiqik. Məhz Prezident İlham Əliyev və Prezident Rəcəb Tayyib Ərdoğanın strateji uzaqgörənliyi sayəsində Azərbaycan və Türkiyə bundan sonra da qlobal arenada birgə və inamlı addımlarla irəliləyəcəkdir. Bu ittifaq Cənubi Qafqazda hər hansı revanşizm cəhdinin qarşısını alan ən böyük sipər, bölgəyə sülh, rifah və davamlı inkişaf gətirən mütləq zəmanətdir.

Rəqibə Paşayeva

Xəbərin oxunma sayı : 487