Millət vəkili Elman Nəsirov Musavat.com-a açıqlamasında REAL Partiyasının Milli Məclisdə təmsilçisi Erkin Qədirlinin fikirlərinin həm təəccüb, həm də təəssüf hissi doğurduğunu bildirib:

“Erkin bəy ilk növbədə özünün qeyri-demokratik yolla seçildiyini bəyan edirsə, bəs onda niyə mandatından imtina etməyib? Yoxsa daxilindəki gizli vəzifə hərisliyi qarşısında əlində bayraq etdiyi ədalət hissi qürubamı çəkilib? Bəlkə müxalifətçilik “ağa qara demək” formulundan başlayır kimi ucuz təbliğata uyaraq bu “etiraf”ı edib? Olmaya xaricdəki “dostlar”ımızdan “REAL özünü yaxşı aparmır” iradları daxil olub və onun qarşılığında həmkarımız adekvat davranış ortaya qoyub? Suallar çoxdur”. 

Elman Nəsirov qeyd edib ki, Erkin Qədirli parlamentdən getmək istəməsə, bu məsələ böyüyəcək:

“Erkin Qədirli yəqin ki, İntizam komissiyasına dəvət oluna bilər. Bundan sonra məsələnin necə olacağı müəyyən edilər. Desə ki, düz eləmişəm, fikrimdə qalıram, bundan sonra da deyəcəyəm, o zaman bir mənzərə yaranır. Amma desə ki, yorğun olmuşam, iclasdan çıxmışam və s. Bu zaman fərqli mənzərə yaranacaq. Mən İntizam komissiyasının üzvü deyiləm, amma mənə elə gəlir ki, çox ciddi tənqid oluna bilər. Sözünün üstündə dayansa, hamını yenə ittiham etsə, belə olan vəziyyətdə istisna deyil ki, onun haqqında ən sərt tədbirlər görülə bilər. İnanmıram ki, məsələ mandatının əlindən alınmasınadək gedib çıxa, töhmət də verilə bilər. Hər şey komissiyaya dəvət alacağı təqdirdə özünün davranışından asılı olacaq. Erkin Qədirlinin dedikləri minlərlə seçicinin seçiminə hörmətsizlikdir, onları təhqir etməkdir”.