Prosesə hakim Əfqan Hacıyev sədrlik edib. Prosesdə dövlət ittihamçısı çıxış edərək Aygün Əliyevanın 8 il 6 ay müddətinə azadlıqdan məhrum edilməsini istəyib.

Son sözlə çıxış edən A.Əliyeva məhkəmədən bağışlanmasını xahiş edib.

Hakimlər heyəti müşavirəyə yollanıb. Müşavirdən sonra hökm elan edilib. Məhkəmənin hökmü ilə A.Əliyeva 8 il azadlıqdan məhrum edilib.

Hadisə bu ilin martın 10-da Binəqədi rayonunun Biləcəri qəsəbəsi ərazisində baş verib.

Qeyd edilən ərazidə yerləşən aptekə gələn Bakı şəhər sakini Aygün Əliyeva orada işləyən qəsəbə sakini Xəyalə Nəcəfovanı bıçaqla hədələyib, kassadan 165 manat aparıb.

6-cı polis bölməsi əməkdaşlarının keçirdikləri əməliyyat-axtarış tədbirləri nəticəsində quldurluğu törətməkdə şübhəli bilinən Aygün Əliyeva saxlanılıb.

İstintaq araşdırması zamanı məlum olub ki, Aygün Əliyeva daha əvvəl də məhkumluq həyatı yaşayıb.

Aygün Əliyeva Cinayət Məcəlləsinin 181.2.5-ci (silah və ya silah qismində istifadə edilən əşyalar tətbiq edilməklə quldurluq törətmək) maddəsi ilə ittiham edilir.