Milli Məclisdə andiçmə mərasimində İlham Əliyev növbəti illərdə də yoxsulluqla, işsizliklə, korrupsiya, rüşvətxorluqla mübarizə aparılacağını bəyan edib.

İqtisadçı Azər Mehdiyev “BBC Azərbaycanca” ilə İlham Əliyevin 7 illik hakimiyyətindən gözləntisini bölüşüb. O, daha çox iqtisadiyyat və biznes mühitinin yaxşılaşdırılmasını gözləyir.

“İnstitusional islahatların aparılması, biznes mühitinin yaxşılaşdırılması xarici investorların ölkəyə cəlb edilməsi arzuolunandır“, -o deyib.

A.Mehdiyev hesab edir ki, ölkədə iqtisadi sferada olan inhisarçılıq aradan qaldırılarsa, xüsusilə məmur sahibkarlığının aradan qaldırılması istiqamətində real addımlar atılarsa, rəqabətli biznes üçün əlverişli şərait yaranar: “Biznesə məmur müdaxiləsi aradan qaldırılsın. Hətta yoxlamaların dayandırılması belə biznesə məmur müdaxiləsinin qarşısını ala bilmir”.

Onun sözlərinə görə, rayon icra hakimiyyəti başçıları öz ərazisində olan biznes strukturlarına istədiyi kimi müdaxilə edə bilir. İqtisadçı hesab edir ki, “iqtisadi və siyasi hakimiyyət ayrılmalı, biznes sahəsində mülkiyyət toxunulmazlığından tutmuş məhkəmələrin müstəqilliyinin təminatına qədər islahatlar aparılmalıdır”.

Hüquqşünas Fərhad Mehdiyev hər şeydən əvvəl o, icbari tibbi sığortanın ölkəboyu tətbiqini vacib sayır. O, xaricdə təhsil proqramının davamını zəruriliyini qeyd edir, bildirir ki, “məhkəmələrin müstəqilliyini, tərəfsizliyini və hüquqa uyğun işləmələrinin” təmin edilməsi üçün də ciddi addımlar atılmasını gözləyir.

Təhlükəsizlik məsələləri üzrə ekspert İlham İsmayıl Qarabağ münaqişəsinin həlli ilə bağlı irəliyə doğru hər hansı fəaliyyət gözləmir, deyir ki, “lokal əməliyyatlar Azərbaycana itkilərdən başqa heç bir şey vermir”.

Keçmiş millət vəkili Sabir Rüstəmxanlı isə gözləyir ki, Qarabağ münaqişəsinin sülh yolu ilə həlli yönümündə ciddi addımlar atılsın, qaçqınlar torpaqlarına qayıtsın. S.Rüstəmxanlı deyir ki, Azərbaycanı “müasir müansibətlər sistemiylə idarə olunan bir dövlətə çevirmək” üçün İlham Əliyevdən yeni komanda gözləyir: “Köhnə sovet və komunist vərdişlərindən əl çəkməyən adamlar var, onlardan xilas olsun”.

Sabir Rüstəmxanlının prezidentdən insan haqlarının müdafiəsini və gənclərin işlə təminatını da gözləyir.

“Ayna-Zerkalo” qəzetinin baş redaktoru Elçin Şıxlı deyir ki, “normal media mühiti yaradılmalıdır. O. azad sözə, jurnalistin həqiqəti söyləməyinə görə həbsə atılmamasını istəyir: “Elə bir şərait olsun ki, KİV-ləri dövlətin maliyyələşdirməsinə ehtiyac olmasın”. (BBC)